Maximus Musculus

Kallinn bara mættur aftur!

2004-01-16T19:07:00.000Z

Jæja þá er nýtt ár gengið í garð og nýtt blogg-tímabil hafið... kannski ágætt að reyna að standa sig aðeins betur á því nýja. Fyrsta skólavikan búin og mikið verið lært þessa dagana. Það er skemmtilegt frá því að segja að ég er í áfanga sem heitir lífsleikni-námstækni. Í fyrsta tímanum vorum við látin skrifa á blað upplýsingar t.d. nefna tvær fyrirmyndir okkar og að sjálfsögðu skrifaði ég nafn forvera míns sem hetja... Jón Sigurðsson FRELSISHETJA ÍSLANDS!!!

Ég átti afmæli ekki alls fyrir löngu og var haldið upp á það með því að kaupa sér Family Guy - þriðju seríu á DVD... mikil snilld. Svo sat maður bara með kók í annarri og fjarstýringuna í hinni í nýja hægindastólnum sem ég fékk í afmælisgjöf og horfði á Family Guy.

Fékk líka nýlega Championship Manager og hef verið að dunda mér solldið í honum síðustu dagana.

Bráðum byrjar Idolið og Svínasúpan og verður horft á það með kók í annarri og hmmmmm... eitthvað í hinni. Ég vona að Jón Sigurðsson, nafni hetjunnar, vinni þetta því hin tvö eru leiðinleg. Svo sér maður bara til hvað maður gerir seinna í kvöld, kannski Family Guy, kannski Champ, kannski jafnvel bíómynd eða eitthvað annað??

Partý?

2003-12-11T20:10:00.000Z

Jæja þá eru prófin búin og glatt er á hjalla. Það er skemmst frá því að segja að þau gengu framar vonum og gott er af því að vita að þau próf sem ég var hvað hræddastur um (stærðfræði og jarðfræði) hef ég staðist með miklum ágætum. Tók stærðfræðina létt... í annarri tilraun.

Ég fór á tónleika í gær... já Muse. Það var gaman... geggjað... mergjað stuð. Ég var þar í góðra manna hópi en týndi hópnum ansi snemma. Ég var ekki lengi að koma mér sem næst sviðinu í blóð, svita og tár. Slagsmál brutust út mjög snemma og ég náði nokkrum góðum höggum... þið hefðuð átt að sjá hinn gaurinn maður! Tónleikarnir náðu algjöru hámarki þegar bandið tók hið stórkostlega lag Stockholm Syndrome og sex risastórar blöðrum skoppuðu yfir áhorfendur. Á þeim tímapunkti var ég reyndar búinn að koma mér þægilega fyrir aftast í salnum og fylgdist með sýningunni.

Þar sem prófin eru nú yfirstaðin væri annað ekki eðlilegt nema að skemmta sér ásamt hópi vina um helgina... en ég verð að vera soldið afbrigðilegur í þetta skiptið því ég er að fara að keppa um helgina. Some other time

Jæja ætli þetta sé ekki bara komið gott... ég vil ekki hafa þetta of langt því þá nennir enginn að lesa þetta. TaTa

Þrífarar

2003-11-28T23:31:00.000Z

Já frumraun mín í þrífara-iðnaðinum hefur nú litið dagsins ljós og glöggir lesendur taka kannski eftir því að einn þeirra er þeldökkur... það lýsir að sjálfsögðu engu nema snilld minni sem þrífara-byggingamanni

Þrífararnir að þessu sinni eru ekki af verri endanum, en það eru þeir:
Jóhann Björnsson; stórstjarna í knattspyrnu og leikur með stórliði Kópavogs
Hernan Crespo; einnig stórstjarna í knattspyrnuiðkun en hann spilar með stórliði Lundúna
Og síðast og síst Outkast sem er rappari

Sárlega móðgaður!

2003-11-28T22:20:00.000Z

Ég var rétt í þessu að lesa þetta blogg hérna, og þar var linkur inn á RollingStones.com þar sem verið var að telja upp 500 bestu plötur allra tíma. Ég fór svona aðeins að rýna í þennan lista og áttu underground-sveitin Bítlarnir, eins og Valur kaus að kalla þá, nokkrar plötur þarna efst á lista. En svo fór ég að leita að mínum svona uppáhalds plötum og ég varð ekki aðeins hneykslaður heldur móðgaður, og sár! (ég veit að þið haldið að ég sé að fara að væla útaf því að Metallica-menn voru ekki hátt skrifaðir, en nei) mín önnur uppáhalds plata í heiminum var ekki nema í 247. sæti! og það er platan Automatic for the People með hljómsveitinni REM... sú plata er náttúrulega ekkert nema tær snilld og fær karlmenn (like myself) til að gráta. Ég er sárlega móðgaður og ég veit að það eru fleiri þarna úti sem eru á sömu skoðun og ég!

Þess má til gamans geta að Metallica átti plötu ofar á listanum, og það skemmtilega við það var, að sú plata er EKKI platan Metallica (Black Album eins og hún er oft kölluð) heldur var það Master of Puppets... rokkið lifir!!!

Lifi byltingin!!!

Wonderful Day

2003-11-28T18:50:00.000Z

Hingað til er dagurinn í dag búinn að vera ýkt frábær...

Vaknaði kl. 06:15 til að fara á æfingu sem var gaman

Fór í skólann beint eftir æfingu kl. 08:00 sem var stuð

Fór í minn fyrsta tíma kl. 10:00, eða réttara sagt munnlegt próf í ensku sem var alsæla

Fór heim kl. 12:40 sem var skemmtilegt

Fór til augnlæknis kl. 15:00 sem var hressandi

Fór heim og horfði á Seinfeld sem var til þess að toppa frábæran dag

Djöfull verður nú gaman í kvöld þegar ég fer bara kannski að læra eða eitthvað!!!

Hver einasti maður deyr, en það lifa ekki allir menn

Góða helgi

2003-11-22T19:52:00.000Z

Góða kvöldið góðir gestir.
Ég vil bara byrja á að óska ykkur góðrar helgar og farsæls mánudags.

Í gær fór ég í bíó með góðvini mínum honum Alberti. Já mikið þykir mér Matrix myndirnar vera ofmetnar myndir. Ég fór í gær að sjá þá síðustu, nokkurnvegin vegna þess að ég varð að sjá hana. Þar sem maður hefur nú eytt tíma sínum í að horfa á hinar tvær, og líka vegna þess að sú fyrsta var alls ekki svo slæm. En mér finnst allavega ekkert varið í hinar tvær, kannski vegna þess að ég skildi eiginlega ekkert í þeim...
Á leiðinni heim úr bíó sáum við eitthvað það skelfilegasta sem ég hef á ævi minni séð. Við vorum að beygja niður afleggjarann heima hjá mér og inni í strætóskýlinu sat geðveikt skuggalegur náungi. Þetta snart mig svo vegna þess að ég var að hugsa um það áður en ég leit inn í skýlið hvað það væri krípí ef það væri einhver þar inni... úhúhúhú... múúhahahaha...

Í dag vaknaði ég um kl. 12:00, en þá fékk ég SMS frá góðbróður mínum honum Vésteini. Þá var hann kominn á The Theater of Dreams (Old Trafford) heimavöll Man. Utd. Skemmtilegt það og fór ég þá að horfa á leikinn sem var við Blackburn og unnu mínir menn að sjálfsögðu 2-1. Og það er líka skemmtilegt frá því að segja að á þessum leik var slegið met í úsvalsdeildinni í áhorfendafjölda á einum leik... það var allt bróður mínum að þakka!!

Þegar leikurinn var búinn fórum við góðvinur minn hann Albert saman í Kringluna. Við fengum okkur Boozt sem er snilld... hollt og gott!!! En þegar við vorum búnir með Booztin okkar ákváðum við að nóg væri komið af hollustunni og fórum því í Hagkaup í Smáralindinni. Þar fórum við í Nammilandið, sem er snilld, og keyptum 900 gr. af blandípoka... og það var 50% afsláttur!! kostaði aðeins 628 kr.!!! snilld. Ætlum svo á eftir í partý með nammið okkar.

ps. ég held að allt skinn sé að flagna af mér! fann hart, dautt skinn á rúminu mínu áðan sem ég komst að að væri af tánni á mér... fyrst gaurinn í strætóskýlinu og svo þetta!!! ég ætla aldrei að fara að sofa aftur!

2003-11-13T21:58:00.000Z

Þeir sem þekkja mig vita hvað ég meina

Skandall!

2003-11-13T21:00:00.000Z

Einn mesti skandall í sögu Fjölbrautaskólans í Breiðholti átti sér stað á Nasa í gærkvöld. Söngvakeppni skólans fór þar fram við fyrir framan fullan sal áhorfendahvaðan af ú FB.
Keppnin hófst á gömlu íslensku lagi sem allir ættu að kannst við og heitir Krummi svaf í Klettagjá, en lagið hafði verið fært yfir í rokk-búning sem kom alveg stórkostlega vel út. Sigurlagið? NEI! SKANDALL!!! Sigurvegarinn var einhver blindfull busastelpa sem söng meira að segja svo lágt að ég heyrði ekki hvort hún hafi sungið réttan texta (ekki það að ég þekki textann við lagið).
Þetta var örugglega einhver klíkuskandall... hún er örugglega í sömu klíku og dómararnir! Hvernig væri að athuga það?

Já ég er vonsvikinn því ég hefði viljað sjá þá Jón Ingvar og Magga eða hana Tobbu í topp 3 sætunum... því endurtek ég orð mín frá því áðan: SKANDALL!!!

En þessi keppni var nú ekki alslæm því ég sá eitthvað það fyndnasta sem ég hef nokkru sinni séð á mínum 18 árum... þannig er nefninlega mál með vexti að góðvinur minn hann Albert var fenginn upp á sviðið til þess að taka þátt í skemmtiatriði. Kynnarnir fengu líka stelpu úr salnum til þess að taka þátt... þessi "stelpa" var eldri en mamma mín!!! og þau voru látin kyssast!!! og það fyndnasta var að Albert var algjörlega tilbúin til að kyssa hana en hún var hinsvegar ekki jafn tilbúin (örugglega harðgift kona og ég skil ekkert í henni að vera að bjóðast til að fara upp á sviðið). Nei, möguleikar Alberts á að vera með ELDRI konu farnir í vaskinn... en örvæntu ekki kæri vinur, þú getur örugglega nælt þér í eina eldri konu.

Ég kveð að sinni
* * ( ' ""() Bye (þetta lærði ég á MSN)
* ("( 'o', ) bye (helvíti sniðugt þetta MSN maður)
* (")(")(,,) * *

ps. starfsfólkið í mötuneytinu hefur snúist gegn okkur... við höfum komið á okkur ljótu orði innan ræstitækni-félaganna!!! what are we going to do!!??!!?!?!?!! aaaaaahhhhhhhhhhhh!!!!!!

2003-11-08T20:10:00.000Z

Ég hata Arsenal!!!

Spurning dagsins: Er til sá enski bakvörður sem er ekki fífl?
Ashley Cole, Danny Mills, Neville-bræðurnir... allir algjörir asnar! Mikill og glæsilegur hópur asna þessir bakverðir

2003-11-05T00:36:00.000Z

Ég er ekki frelsari. Frelsarar eru ekki til. Fólkið frelsar sjálft sig.

Skeiðarárhlaup '96

2003-11-03T20:23:00.000Z

Í morgun (réttara sagt í fyrsta tíma) fyrir fyrsta kaffibollann var ég í eldhressum jarðfræðitíma hjá Áslaugu, þar sem ég var að læra um t.d... öööööööö... jæja skiptir ekki máli... en allavega þá fengum við í lok tímans að sjá myndir frá eldgosinu í Vatnajökli og Skeiðarárhlaupinu '96. Hver man ekki eftir þeim merka atburði??? Já, þetta er bara einhver sá flottasti og skemmtilegasti atburður í sögu íslenskra vísinda... miklu skemmtilegra en að horfa á Eyjagosið og flýjandi hippa!! Já Skeiðarárhlaup '96... en það skemmtilegasta við þetta allt saman var að á meðan ég horfði á þessar stórkostlegu myndir rifjaðist upp fyrir mér einn lélegasti sjónvarpsþáttur sem ég hef nokkurntíman séð... enda lifði sá þáttur ekki lengi... já ég er að tala um Baywatch Nights með David Hasselhoff í aðalhlutverki... þessi þáttur var í einhverskonar tilraun hans til að fylgja eftir velgengni sinni með þáttinn Baywatch sem væntanlega flestir kannast við... flestir pirruðu sig á því að sá þáttur væri í raun textaður.
En eftir að hafa aflað mér aðeins meiri upplýsinga um þáttinn stórkostlega Baywatch Nights komst ég að því að einhverjum asna finnst þættirnir vanmetnir og finnst þeir sýndir of lítið í sjónvarpinu... talar líka um hina fullkomnu blöndu!!! hahaha!!!
En ástæða þess að jarðfræðimyndin minnti mig á þennan þátt var sú að í einum þættinum voru sýndar myndir frá gosinu í Vatnajökli og þátturinn fjallaði um það að í Vatnajökli hafi verið frosnir víkingar frá ísöld sem losnuðu í gosinu og urðu brjálaðir þegar þeir voru þýddir og Mitch Buchanon (David Hasselhoff) þurfti að bjarga málunum... einhver asnalegasti þáttur sem ég hef séð, þættirnir voru álíka vel gerðir og klámmynd með söguþræði, en það sem er samt enn svolítið skemmtilegt við þetta er að annar leikarinn sem lék víking í þættinum hefur leikið í einhverjum íslensum kvikmyndum, en ég efast þó um að hann sé íslenskur.

Þetta var skemmtileg endurminning af einum skrítnasta þætti okkar tíma þar sem David Hasselhoff fer á kostum og ef ég þekki kallinn rétt söng hann örugglega líka lagið sem hljómaði í byrjun þáttanna og hét "After the Sun Goes Down".

Mæli með þessari síðu.

2003-11-02T20:36:00.000Z

Við deyjum öll að lokum; spurningin er aðeins hvernig og hvers vegna.

Vandræðalegt fyrir mig? Nei þig!

2003-10-31T16:26:00.000Z

Downs Syndrom er sjúkdómur sem fólk fær við fæðingu. Sjúkdómurinn lýsir sér þannig að fjöldi litninga í frumum fólksins eru 47 í stað 46. Ef þið, ágætu lesendur, vitið ekki hvað ég er að tala um þá er ég að segja frá fólki sem oft er kallað mongólítar í daglegu tali. En flestir sem þekkja til fólks mað þessa gerð af sjúkdómi er illa við að þau séu kölluð þessu nafni og hef ég heyrt að þetta orð hafi fyrst verið notað um þetta fólk vegna þess hversu niðrandi það hljómar. Manneskjur með Downs-heilkenni er mjög einkennandi í útliti og hafa þau skásett augu, flata nefrót og beina línu þvert yfir lófa.
Ég er enginn sérfræðingur í þessum efnum og veit reyndar mjög lítið um sjúkdóminn en hef þó tekið eftir því, eins og flestir aðrir, að fólk með sjúkdóminn er yfirleitt hresst og hefur gaman af lífinu. Ég las það þó á www.downs.is að allir sem eru með Downs-heilkenni hafi ýmiskonar skapgerð og tilfinningar rétt eins og allir aðrir, þannig að þau eru ekkert alltaf glöð.
En ástæða þess að ég skrifa svona mikið um þennan sjúkdóm er að ég hef lent í þeirri mjög svo vandræðalegu stöðu að stelpa í skólanum mínum, sem er með þennan sjúkdóm, er orðin ástfangin af mér. Hún heitir Lóa. Hún er átján. Hún er mjög vinsæl innan skólans. Það eru fáir innan raða skólans sem þekkja jafn marga í skólanum og hún Lóa. Lóa er mikið fyrir það að kitla aðra nemendur í frímínútum.
Já hún Lóa hefur opinberað ást sína til mín oftar en einusinni og kallar mig "ástina sína" endrum og eins. En afhverju er þetta svona vandræðalegt? Ég meina, útlitið á ekki að skipta máli, og þar að auki er hún mjög skemmtileg... það ætlar enginn sem þekkir Lóu að segja mér að honum/henni finnist Lóa leiðinleg!!! Hún er kannski seinþroska, en ég þekki nú alveg stráka sem hafa verið að slá sér upp með yngri stelpum... Já kannski ætti maður ekki að vera svona fráhrindinn og kannski gefa þessu sjéns! eða... nei ég held ekki... ég bara get ekki séð mig fyrir mér í framtíðinni í sjóðheitu sambandi við Lóu... en kannski einhverja aðra stelpu með Downs-heilkenni... það er aldrei að vita.

En svona að lokum vil ég nefna það að eftir að Lóa opinberaði ást sína til mín hef ég skinjað mikla fordóma í garð hennar og fólks með Downs Syndrom almennt og þykir mér það miður þar sem þetta fólk er í raun mjög skemmtilegt... ég bara held að fólk kannski kunni ekki að haga sér á réttan hátt í kringum þau... fólk verður oft bara vandræðalegt og veit ekki hvað á að segja við "svona fólk". Ég er alls ekki að segja að ég sé eitthvað laus við þessa fordóma og viti eitthvað betur... bara það að ég hef séð þetta gerast og sumir ættu kannski að hugsa sinn gang rétt eins og ég mun gera! ...bróðir minn á líka afmæli í dag: Til hamingju Óli

Strákur með Downs-heilkenni

Bróðir minn á afmæli í dag

Kópstock 2003

2003-10-28T14:14:00.000Z

Fyrstu helgina í júlí árið 2003 var "útihátið" haldin á tjaldsvæðinu á Álfaskeiði sem er staðsett rétt utan Selfoss. Eins og flestir væntanlega vita eru margir sem taka sig til um þessa ákveðnu helgi og ferðast um landið... en ekki til að njóta hinnar geysifallegu náttúru sem Ísland hefur uppá að bjóða. Nei, ungt fólk frá hinum ýmsu bæum tekur sig til og dettur í'ða einhversstaðar á sem mest framandi slóðum. Já og ág vildi ekki vera útundan og ákvað því að skella mér á Álfaskeið. Mér til mikillar undrunar, en samt ánægju, hafði margt fólk úr Kópavoginum góða lagt leið sína á Álfaskeið (en ég er einmitt úr Kópavogi). Ég var þarna í góðum gír á Kópstock með félögum mínum úr Breiðholtinu. En þessi saga er ekki frásögum færandi nema fyrir þær sakir að meðal fólksins á Kópstock voru "undercover" lögregluþjónar sem keyrðu um svæðið og gripu fólk sem var ölvað undir stýri. Ég og félagar mínir skemmtum okkur konunglega þangað til að ég ákvað að færa bílinn hennar mömmu tvo metra áfram því hann var í vegi fyrir öðrum bílum. Þegar ég hafði fært bílinn þessa tvo metra og drepið á honum var bankað á rúðuna hjá mér. Maður í svörtum leðurjakka og með asnalegasta löggumerki sem ég hef á ævi minni séð í veskinu stóð við gluggann og sagði mér að stíga útúr bílnum. Í fyrstu hélt ég að maðurinn væri að grínast því hann leit út eins og lélegur leikari í asnalegri íslenskri stuttmynd gerðri af 12 ára krökkum og hann var með það sem virtist vera heimatilbúið löggumerki. En viti menn, hann var ekki að grínast, og það sem meira er þá fannst honum hann vera töff. Ég var sendur á blóðtöku og tveimur og hálfum mánuði seinna missti ég bílprófið í 12 mánuði.
Þetta er einhver versta lífsreynsla sem ég hef lent á og það sem mér þykir verst við þetta allt er að láta svona ógeðslega asnalega gaura í lögg' og bóa-leik taka mig fyrir svona litlar sakir. En ég bara spyr: er ekki hlutverk löggunnar að vera sýnileg á svona svæðum til að koma þá í veg fyrir að fólk keyri fullt? Ég hefði þá kannski getað beðið þá að færa bílinn fyrir mig!
Það er því niðurstaða mín að löggan (allavega svínin á Selfossi) hugsar meira um að græða peninga heldur en að reyna að koma í veg fyrir slys vegna ölvunaraksturs. En ég ætla ekki að láta einhverja helvítis fasista frá Selfossi eiðileggja heilt ár fyrir mér heldur lifa lífinu án bílprófs og læra af reynslunni.

Skítur næst betur af heldur en blóð...

2003-10-28T00:38:00.000Z

Ég þekkti mann sem sagði eitt sinn að dauðinn brosti við okkur öllum. Allt sem maður getur gert er að brosa til baka.